☰
☰
ព្រះយេស៊ូវបានបង្រៀនថា៖ បើផ្ទះណាគ្មានគ្រឹះរឹងមាំទេ នោះមិនយូរមិនឆាប់ផ្ទះនោះនឹងដួលរលំជាមិនខាន។ ដូចគ្នាផងដែរ ចំពោះជំនឿគ្រីស្ទបរិស័ទ ប្រសិនបើជំនឿរបស់យើងមិនមានគ្រឹះរឹងមាំទេ នោះយើងក៏នឹងមិនអាចស៊ូទ្រាំបានឡើយ នៅពេលជួបទុក្ខលំបាក។ ដើម្បីឲ្យយើងអាចស៊ូទ្រាំបាន យើងត្រូវតែសង់ជំនឿរបស់យើង នៅលើសេចក្តីពិតដ៏រឹងមាំនៃព្រះបន្ទូលទ្រង់!
ហេតុនេះហើយបានជា កន្លងមកនេះ មានគ្រូគង្វាលជាច្រើននាក់បាននាំគ្នាប្រើប្រាស់វិធីសាស្ត្រដ៏សាមញ្ញមួយ ដើម្បីបង្រៀនអំពីចំណុចស្នូលនៃគោលលទ្ធិជំនឿគ្រីស្ទបរិស័ទដល់អ្នកជឿថ្មីៗ។ មានឪពុកម្តាយដែលជាគ្រីស្ទបរិស័ទជាច្រើនក៏បានប្រើប្រាស់វិធីសាស្ត្រនេះ ដើម្បីអប់រំកូនចៅពួកគាត់ផងដែរ។ ទីក្រុងថ្មី គឺជាវិធីសាស្ត្រដ៏សាមញ្ញ។ តាមរយៈការប្រើប្រាស់វិធីសាស្ត្រសំណួរ-ចម្លើយខ្លីៗនេះ នោះមនុស្សទាំងអស់អាចយល់ដឹងពីចំណុចសំខាន់ៗជាច្រើននៅក្នុងព្រះគម្ពីរបន្តិចម្តងៗបាន។
នៅឆ្នាំ ១៥២៩ អ្នកដឹកនាំគ្រីស្ទបរិស័ទដ៏ល្បីល្បាញម្នាក់ឈ្មោះលោក ម៉ធិន លូសើរ (Martin Luther) បានពណ៌នាពីស្ថានភាពគួរឲ្យសោកស្តាយរបស់គ្រីស្ទបរិស័ទក្នុងជំនាន់នោះនៅប្រទេសអាល្លឺម៉ង់។ គាត់បានសរសេរថា៖ «មនុស្សសាមញ្ញធម្មតា ជាពិសេសអ្នករស់នៅតាមភូមិ ស្ថិតក្នុងភាពងងឹតសូន្យសុង ទាក់ទងនឹងជំនឿគ្រីស្ទបរិស័ទ ហើយរឿងដ៏គួរឲ្យសោកស្តាយជាងនោះទៅទៀតគឺថា ក៏មានគ្រូគង្វាលជាច្រើននាក់មិនមានជំនាញ និងសមត្ថភាព ដើម្បីជួយសមាជិកក្រុមជំនុំរបស់ខ្លួនបានទេ។ ទោះបើពួកគេបានទទួលពិធីជ្រមុជទឹក ពិធីលៀងព្រះអម្ចាស់ ហើយមិនស្គាល់ពីសេចក្តីអធិស្ឋានរបស់ព្រះអម្ចាស់ និងគោលជំនឿគ្រីស្ទបរិស័ទ ឬបញ្ញត្តិដប់ប្រការក៏ដោយ ក៏ពួកគេនៅមានឈ្មោះថាជាគ្រីស្ទបរិស័ទដែរ។ ការនេះហើយ ដែលធ្វើឲ្យពួកគេរស់នៅដូចជាហ្វូងគោ ហ្វូងក្របី ឬជ្រូកដែលល្ងង់ខ្លៅ»។ នៅជំនាន់លោក ម៉ធិន លូសើរ ក៏មានគ្រីស្ទបរិស័ទជាច្រើនដែលមិនចេះអានអក្សរ ព្រមទាំងមិនស្គាល់ពីសេចក្តីពិតសំខាន់ៗនៅក្នុងព្រះគម្ពីរផងដែរ។ ដោយសារតែមូលហេតុនេះហើយបានជាលោក ម៉ធិន លូសើរ ទូន្មានដល់គ្រូគង្វាល និងគ្រូបង្រៀនទាំងអស់ ឲ្យខិតខំអប់រំក្រុមជំនុំរបស់ខ្លួន ដោយប្រើប្រាស់វិធីសាស្ត្រសំណួរ-ចម្លើយខ្លីៗនេះ។
គោលបំណងរបស់អ្នកនិពន្ធកូនសៀវភៅនេះគឺ៖ ដើម្បីយកវិធីសាស្ត្រដ៏មានប្រសិទ្ធិភាពពីជំនាន់មុនមកកែសម្រួល និងប្រើប្រាស់ក្នុងសម័យបច្ចុប្បន្ននេះឡើងវិញ។ រីឯយើងដែលជាក្រុមអ្នកបកប្រែសៀវភៅនេះជាភាសាខ្មែរ យើងសង្ឃឹមថា ព្រះអម្ចាស់នឹងប្រើប្រាស់វា ដើម្បីពង្រឹងជំនឿរបស់ពួកជំនុំខ្មែរ គ្រប់វ័យទាំងអស់។
សូមព្រះអង្គប្រទានពរ!